Nýr framkvæmdastjóri Auðnu tæknitorgs

Ingunn Sigurpálsdóttir ráðin framkvæmdastjóri Auðnu tæknitorgs

Auðna tæknitorg hefur ráðið Ingunni Sigurpálsdóttur í starf framkvæmdastjóra fyrirtækisins. Hún tekur við starfinu af Einari Mäntylä sem kom að stofnun Auðnu og hefur starfað ötullega við að byggja upp starfsemina undanfarin 6 ár. Ingunn tók við starfinu þann 1. maí 2025 og mun leiða áframhaldandi uppbyggingu og þróun starfsemi Auðnu, sem gegnir lykilhlutverki í íslensku nýsköpunar- og rannsóknarumhverfi með því að aðstoða háskóla- og vísindasamfélagið við að skila uppfinningum og hagnýtanlegum rannsóknarniðurstöðum til samfélagsins í formi lausna, verðmætasköpunar og aukninnar samkeppnishæfni.

Áður en hún tók við sem framkvæmdastjóri starfaði Ingunn sem markaðs- og fjármálastjóri Auðnu. Hún býr yfir víðtækri og fjölbreyttri reynslu af stjórnun, markaðsstarfi og fjármálum úr íslensku atvinnulífi, sem hefur veitt henni dýrmæta innsýn í það hvernig styðja má við frumkvöðla, efla samstarf og stuðla að árangri í nýsköpunarumhverfi. Ingunn er með B.Sc. gráðu í rekstrarverkfræði frá Háskólanum í Reykjavík og hefur auk þess styrkt þekkingu sína með sérhæfðum námskeiðum í verkefnastjórnun, stafrænum markaðsmálum og viðburðastjórnun.

„Það er bæði mikill heiður og spennandi áskorun að taka við starfi framkvæmdastjóra Auðnu tæknitorgs,“ segir Ingunn. „Félagið hefur á undanförnum árum byggt upp mikilvæga innviði sem styðja við nýsköpun á Íslandi og ég hlakka til að vinna með frábæru teymi og samstarfsaðilum til að efla þetta starf enn frekar.“