MasterClass í vísindalegri nýsköpun með Háskólanum í Reykjavík

Þriggja daga námskeið þar sem lögð var áhersla á vísindalega nýsköpun, fjármögnun og hugverkarétt.

Sandra Mjöll Jónsdóttir-Buch, Ph.d.

Í síðustu viku hélt Auðna Tæknitorg MasterClass-námskeið sem var sérstaklega sniðið að rannsakendum við Háskólann í Reykjavík. Þátttakendur – aðallega doktorsnemar og nýdoktorar – komu saman í þrjá daga til að kafa ofan í heim nýsköpunar og hagnýtingar á rannsóknarverkefnum.

Frá hugverkarétti til hagnýtingar

Námskeiðið var haldið í Háskólanum í Reykjavík og Grósku og var blanda af fyrirlestrum og hópavinnu með leiðbeinendum. Fjallað var meðal annars um hugverkarétt, Business Model Canvasinn, fjármögnunartækifæri og framkomu. Frumkvöðlar og sérfræðingar héldu fyrirlestra og deildu hagnýtum ráðum sem þátttakendur geta nýtt sér í sínum rannsóknum og framtíðaráformum.

Viðbrögðin voru afar jákvæð og voru þátttakendur sérstaklega ánægðir með hvað efnið mun gagnast þeim í áframhaldandi vinnu og hversu dýrmætt það var að fá beina leiðsögn frá reynslumiklu fólki úr atvinnulífinu.

Við þökkum þátttakendum kærlega fyrir frábæra viku og hlökkum til næsta MasterClass með Landspítalanum í apríl!